安室訪港 機管局警方齊出動

濱崎步已不成氣候，當年死敵安室奈美惠仍氣勢如虹，今日來港準備16號喺亞洲博覽館開一場個唱。航班於下午2時28分抵港，安室一身桃紅色西裝褸於3時10分出來。半百fans一早已到場，當中不乏來自日本同內地嘅歌迷。佢哋著晒fans club tee、拎晒banner同cute版畫像紙牌，仲預備咗一本相簿送畀安室，可惜安室冇行埋去收禮物。

今次安室來港，認真大陣仗。6名日本保安搭早一班機抵港視察環境同拍低現場情況，工作人員加埋保安都有約30人，機管局同警方亦有十幾人，加埋約2、30個記者，勞師動眾。由於大會事先張揚安室會做訪問，故大家都屏息以待；進行訪問前，工作人員仲預先請傳媒去唔同位置「度位」，睇吓正式做訪問時嘅燈光、背景影出嚟靚唔靚，盡現日本人要求嚴謹完美風格。

不過安室抵港後，只係喺上車前停低，講咗兩句。安室話﹕「心情好緊張，希望此行可以好好享受享受音樂，以及同fans相處嘅時光。」講完即回頭望一望fans，之後就上車離開。

蘋果日報14.03.2013